Пригородни районерча юртара Шолхера кашамаш да ераш. ХIираш Октябрьское аьнна хийцай цу юрта цIи. Укх кашамашка дIабехка боахкараш гIалгIай диъ тайпан Боранаькъани, Чуранаькаъани, Льяннаькъани, Хаматханнаькъани нах ба.
Таханарча дийнахьа саг дIаволла йиш йолаш нах дIабехкаш кашамаш да уж. Бакъда из моттиг геттара воча хьале йийрза латт, гонахьара доазув лорадеш а, царга хьожаш доал деш а саг воацаш. 1992 шера гIалгIашта духьал хиннача тIемах байдда баханза ца бовлаш цу юртара беха дIабахача наьха шоай байна нах дIабохка аьттув хиннабац массехка шерашка, цудухьа дIабехка нах кIезигбеннаб. Къамашта юкъе этта хатар бахьан долаш хIирий Iаьдало гоамал кхы а совъяккхай. Таханарча дийнахьа хала долаш аьттув ца хиларагI наггахьа мара саг дIаволлац укхаза, ГIалгIайчен кхыча аттагIйолча юрташка дIабехк наха шоай байнараш. Из халийта йиш йолаш хIама дац!
Цкъа-дале боарзий, чуртий хьал талх укхаза нах хьаухаш ца хилар бахьан долаш. Цига нах дIабехкаш ца хиларагI зерат де ухараш кIезигагIа ба. Цудухьа ма хулла шоай байна нах укх шоай кашамашка дIабехка беза. Нагахьа санна укхаза шоашта новкъало йой, е аьттув ца луш хIама хуле дукха наькъаш да латкъа йиш йолаш — Миннаце, кхыча Iаьдала органашка.
ШозлагIа-дале, гонахьа ларттIа карт ца хилар бахьан долаш хьайбаш чуухаш кашамаш ийрчадоахаш моттигаш нийслу. Дийна болча хана даьча а ца Iеш байча а Iазап лоаттаду цу наха духхьал вай мелал бахьан долаш!!!
Вай юхь я из, вай бехктокхаме да из гIулакх дIанийсдара, из деце кхувш боагIачарна вай дIалуш бола хьокхам, масал да из. Воай юрт дIа а лаьца багIача наха сов кIезиагал мишта гойт вай, яхь еций вай, фу даьд вайна?
Нагахьа санна, уж кашамаш дIа а ца доахаш дисар воашта дезе уж тоаде деза, кашамашта эшашбола кхоачам лоаттабергболаш цIалг хьалдотта деза, дакъа лувчадара кхоачам Iалаш бе беза, зерат де баьхкача наьха машенаш дIаовттае моттиг.
Доккха дехар да тха шуга, вала декхар вар хьаоарцагIа а ваьле, цу юртара арабаьха нах вIашагIа а техе, дезе ахча а гулдий кашамаш дIадаргдоаца оагIув е, аьнна. Вай тахан оарцагIа ца довле дIадахар кхерам болаш да муръенна вай дай тIехкаш яьда Шолхара кашамаш. Боккъала а терко йоацаш ма дита ер гIулакх. Дала а наха а баркал аргда шоана!