«Лаьтто д1ахецац»

Хьай болча низаца кхера ураг1акхессе, хьежа.
Из сиха 1обожаш гургда хьона кастта.
Хой хьона, кхера юха лаьтта х1ана бежар?
Малаг1ча низо из кхера юхалостабар?

Лаьтта. Вай дерригаш а да цун сомаш.
Ший хана цо шевар шийна чуэц.
Кхыметтел вахар а да валарга додаш,
Гобоахача кхесторгах б1арг биза кхец.

Ц1и ч1оаг1а ягарах д1айовнза йисац,
Б1аьшерашца иха хьастарий хий а лакъ.
Саг, цун вахар а даимленна дисац,
Лаьттах д1адол цун са д1адаха дакъа.

Дунен чу сомаш шоай лоарх1амца хьувкъ,
Н1аний а хьувз лаьттта цамцадоахаш.
Саг вах, цо дикаех хьалбузе букъ,
Цу дико тел низ лаьтта дахача ноахала.

Лоаца да вахар — хьона хам бе ховлда!
Шеддар латт ханаца! Из 1а кхетаде.
Ха зехьа йоаеш хьа вахар ма г1олда,
Хье кхера санна вожалга ма хьежа.

13.07.21.»Лаьтто д1ахецац—Земля не отпускает»

«Рузкъо са х1алакду»

Хозаш вац со сакхетама оаз,
Даиман рузкъа лехаш лел.
Дего дехар лац хьахаза,
Ахчанца гу сай йола кхел.

В1аьхий ва со, мукъа-м вац,
Сай рузкъан хиннав со хаьхо.
Из 1оадар мара, бала бац.
Дезаш да син хилар в1аьхий.

Хийцаб доттаг1ий аз, хьисап, тхов,
Дохкарца — эцарца сай са 1ехаду.
Яхьархой 1ото1абаь магар къовла,
Сакъердам бац, хаьдаб цунцара маза.

Со лехаш лел, са сина сатем байнаб,
Шераш д1аух хоалуш сердал йоцача.
Т1ахьайзача рузкъанца дог — м тайнад,
Амма лерх1ам гац сайца наха лоацаш.

Иразе вий со? 1овдалга хаттар деций?
Из дацар аз сай сина т1ехьлен дийхар.
Массанахьа кхача г1ертар со морг веций?
В1аьхий ва, бакъда вац со везаш лийрх1ар.

Сага са х1алакду харцахьа гулдеча рузкъо,
Мекъало дег1ах муръенна гударг ю.
Дуне диаь д1аводаш 1а фу д1ахьо?
Вахар-м д1а-юха хьажале кхоачалу.

Фуд эшар вайна хоза, г1оза даха?!
Син сабар, из да доккха совг1ат вайна.
Са да хьа укх дунен чу дола в1оахал,
Синмоцал эккхае 1а дег чу 1айна.

Сага са х1алакду харцахьа гулдеча рузкъо,
Сай чурча оазага ладувг1а сона лац.
Цо йох: «Са доттаг1а, якхало мича вуг хьо? »
Массавар мо, хьо а ваха вусаргвац.
Со-м хозаш вац.

13.07.21.

«Ялсамале Ноаной когашта к1ала я»

1а хьай нанна халахетараш ма де!
Везаг1а вайна кхы саг кхеллавац,
Наьна морзол ч1оаг1аг1а морзо яц.

Ханага этта нана езаш лелае!
Дог к1аьдде оала дешаш кхо ма де.
Цун бесаздаьнна б1аргашта тешам ле,
Наьнацара декхар лерх1аме лораде.

Бочалца наьна кулгаш ц1енаде,
Хьайна ма могга нана хестае.
Цун х1ара деша духьала сабарде,
Сатоха, г1ожал ма к1одае.

«Ялсамале ноаной когашта к1ала я».
Дерригача дуненна да хьо вале а,
Хьай нана раьзае в1ашт1ехь ца доале,
Ялсамален д1оаг1а йиш я хьа доаде.

Ду1ашца денош, бийсаш 1а д1акхахьарах,
Маьждигаш хьадеш даиман хьо вахарах,
Из деррига зехьа да. Жожаг1ате хьежаргья,
НАЬНА декхар дицдаьчун ялсамале къовларгья.

12.07.21. «Ялсамале ноаной когашта к1ала я»

«Нитташ»—»Крапива»

Нитташ дукха хьат1абаьлча, сийна буц т1аяьлац,
Корсама яг1ача метте г1аьнаш легаш гац.
Яхь йола къонгаш сийзача даьца кхуврбац,
Майра хила мег, амма сий-м хургдац.

Г1ум дукха йолча хий хьувкъаме латтац,
Тешаш доаца дог къахетамца детталац.
Дег1 б1ехдаьча кхалсага эздий йо1 оттац,
Хоза хила мег, амма овла-м ц1ена хургбац.

Сийрдача дийнахьа г1етташ сигала бов гац,
Мел дукха кхабарах кара1амац борз.
Бокъо а лора ца еча къаман юкъе йисац,
Халкъа кортамукъале къовсамца йовз.

Нитташта — т1ом. Аре хозйойла баьцо!
Сигала аьрзи г1етташ, легалда гаьний г1а.
Борз яхийла хьунаг1а, хьувкъам лулба лаьтто,
Бокъо езача халкъо ма кходолда са.

Берий бехк бац, ма белаш царна эшам,
Даьй-ноаной къинош дезал токхаш дац.
Цар б1ехача морзоно х1алакбу хоза тешам,
Харцбаьннача наха шоаш ду зе х1ана хац?

Овла т1ара ца йог1а т1ехье яхац т1ехьлен хинна,
Ц1ий, шура — бух ба, цох латт ноахала низ.
Да-нана—уж ба бехке дайнача сийна,
Пхьу кхабарах хьона гургьяц цунах хинна борз.

14.07.21.

3 2 голоса
Рейтинг статьи
Подписаться
Уведомить о
guest
0 комментариев
Межтекстовые Отзывы
Посмотреть все комментарии